LAVUORS E REGISTRAZIUNS CHAMPESTRAS
Sco basa per elavurar üna carta geologica da qualità ans servan bunas cugnuschentschas academicas da la regiun (impustüt la stratigrafia e la geologia structurala) ed ün sen marcant per las qualitats e’ls problems d’üna carta geologica. Nus dovrain technicas modernas per cartografar (p. ex. GPS-tracing, o lura fotogrammetria), però id ans es consciaint, cha bleras intschertezzas chi s’inscuntra oura illa champogna nu pon gnir eliminadas cun üna megldra precisiun, ma sun pel solit liadas cun differentas pussibiltads d’interpretaziun, concept o classificaziun. Perquai vain mincha mez kilometer quadrat adüna eir indichà cun ün uschedit «factur da credibiltà».
Tuot quai chi vain observà sül terrain vain descrit minuziusamaing – saja quai in fuorma da datas masüradas (p. ex. orientaziuns da structuras, temperaturas da funtanas, puncts GPS) o lura cun descripziuns, fotografias ed eir blers disegns. Tuot quellas infuormaziuns vegnan lura resümadas sülla carta. Tant sco pussibel vaina disferenzià consequentamaing tanter interpretaziun püra e dretta observaziun (ma in mincha cas vegnan proponüts tuots duos).
CARTOGRAFIA DIGITALA
Las aignas registraziuns illa champogna (ma eir quellas da cliaints) vegnan adüna digitalisadas e sgüradas in registers da datas georeferenzadas. Bleras jadas vegnan las datas da terrain (impustüt quellas geomorfologicas) amo controladas ed adaptadas tenor las datas geograficas disponiblas (p. ex. il model da la cuntrada, swissALTI3D o luras ils purtrets ariatics, SWISSIMAGE). Partas datas pon lura eir gnir generadas sülla basa da las datas da terrain ed otras datas geograficas (p. ex. cartas d’isoipsas, interpolaziun da masüras da structura). Las datas da terrain vegnan pel solit digitalisadas aint in ToolMap, ün pitschen program Open-Source chi permetta da digitalisar in möd svelt, net e structurà, quai chi sun eir las pretaisas da l’Uffizi da Topografia, swisstopo. Per visualisar ed analsisar las datas cartograficas lavuraina pro CARTOGRIP cun QGIS. Schi’s tratta però da furnir üna carta pronta pel squitsch, lavuraina cun plüs scripts programmats («Python») in aigna producziun per crear üna carta netta, bella ed inclegiantaivla e tilla exportar in differents formats (incl. PDF, SVA, TIF).
PROGRAMMAZIUN GEO-INFORMATICA
CARTOGRIP sviluppa per sia aigna lavur instrumaints geo-informatics e quai cun divers böts. In parts cas vegna improvà dad automatisar o da simplifichar ün process special chi sto gnir manà tras in möd repetitiv. In oters cas ans güda la programmaziun ad incleger tscherts problems geologics per pudair interpretar plü güst e plü fundà. Bleras jadas vaina eir programmà pro CARTOGRIP per pudair exportar tschertas datas in möd efficiaint, net e bel. Quai pon esser cartas, ma eir tagls e profils.