Imprender ils concepts da la geologia es ün pa sco imprender üna nouva lingua chi’t permetta da leger ed incleger (almain parzialmaing) la cuntrada. Daspö il cumanzamaint da mia carriera da geologia suna paschiunada da la lectüra da la significaziun da la cuntrada (impustüt las Alps), ma eir fascinada da las « ieroglifas » da quista lingua – da lur möd da transmetter ün messagi, lur stil, lur culuors etc. Tschertas da quistas ieroglifas da la lingua geologica – quai voul dir cartas, models, tagls, profils, disegns etc. – pon esser d’üna tala finezza e cun ün tal sen estetic chi’s pudess bod discuorrer d’ün’ouvra d’art. E pür, mincha punct, mincha strich, mincha culur ha ün sen, cuntegna infuormaziuns e quinta istorgias tras spazi e temp. Eu sun persvasa cha propcha bellas rapreschantaziuns rendan la scienza da geologia na be plü fascinanta, ma eir plü clera, plü inclegiantaivla e dafatta eir plü nüzziaivla. Quist savoir-faire geologic esa da stimar, promover ed impustüt eir cultivar.
Davo avair ramassà ün pakettin da cumpetenzas i’l chomp da la geologia alpina e structurala e m’avair specialisada illa cartografia geologica n’haja decis da fundar CARTOGRIP ScRL, ün affar chi spordscha servezzans e consultaziuns a reguard rapreschantaziuns geologicas illas trais dimensiuns dal spazi. I’s tratta da la cartografia geologica, l’analisa e l’interpretaziun da la structura/geometria, la programaziun in sistems d’infuormaziun geografica (GIS) o lura simplamaing d’illustraziuns da profils, tagls, panoramas, schemas o disegns.
CARTOGRIP ScRL ha sia basa a Sent, ingio ch’eu sun nada e creschüda sü. La geologia da la cuntrada da l’Engiadina es fich interessanta e variada. Dürant plüssas stads illa champogna n’haja fingià pudü stübgiar il Piz Mundin. I’m fa uossa fich plaschair cha tras CARTOGRIP possa continuar ad improvar da decifrar e modelar las ieroglifas geologicas da l’Engiadina Bassa.
Anna Rauch per CARTOGRIP ScRL