Carta geologica ufficiala dal fögl Samignun
CARTOGRIP ramassa e digitalisescha tuot las datas ed observaziuns a reguard la geologia sül territori dal fögl “Samignun-Ischgl” ad üna scala dad 1:25’000. Quai voul dir blera lavur da champogna, perscruttaziuns e bleras lingias e puncts sül computer.
Incumbenza: Uffizi federal da topografia (swisstopo) – Servezzan geologic svizzer
2021-2023
Revisiun da la carta tectonica Svizra (1:500'000)
Revisiun, actualisaziun ed adaptaziun da la part süd da la carta tectonica svizra (aint il GIS) tenor las nouvas datas disponiblas e tenor ün nouv concept tectonic miss in pè dad üna gruppa dad experts.
Incumbenza: Uffizi federal da topografia (swisstopo) – Servezzan geologic svizzer
2020-2021 (per CARTOGRIP)
Geologia Motta Naluns
Illustraziuns ed explicaziuns pel public general sur da la geologia intuorn la regiun da skis Motta Naluns – per scuvrir cun far üna spassegiada o üna skiada. CARTOGRIP ha miss in pè il concept, disegnà, retscherchà las infuormaziuns geologicas e tillas cumplettà cun interpretaziuns. Daplü infuormaziuns: quia!
Incumbenza: Pendicularas Scuol SA
per la stà 2022
Svilup d'ün "tool" geoinformatic culla lingua da programmar "Python"
Tenor üna metoda sviluppada dürant il doctorat, vaina sviluppà ün “tool” per analisar la geometria da las lingias geologicas disegnadas sün cartas. Per far quai esa stat da tradüer la lingua da programmar “Matlab” in quella da “Python”.
Incumbenza: Uffizi federal da topografia (swisstopo) – Servezzan geologic svizzer
prümavaira 2021
Purtrets panoramics per privats
Singuls purtrets panoramics sun gnüts fats per divers cliaints privats chi vaivan interess e gust da pichar sü pro els ün purtret chi cumbina natüra, infuormaziuns geologicas e decoraziun. Els han pudü tscherner lur vista preferida.
Incumbenza: diversas persunas privatas
dürant il 2021 ed inavant
Instrucziun a l'Università da Genevra
Instrucziun d’ün modul da Master d’ün’eivna a l’Università da Genevra. In quist modul cul titel “Cartographic Data Management” vaina muossà als students co ir intuorn cun datas cartograficas geologicas, co tillas structurar, digitalisar e tillas dovrar per far analisas.
Incumbenza: Université de Genève – Département des Sciences de la Terre
Marz 2022
Cartografia geologica in 3D dal Piz Tschütta
Previs per la stà 2022 es ün proget pilot per far üna carta geologica directamaing in trais dimensiuns sün ün model fotogrammetric (registrà cun dronas). Quai es impustüt interessant là ingio chi’d es fich stip e bleras unitads geologicas. Perquai es il piz dal Piz Tschütta ideal per quist experimaint.
Incumbenza: Uffizi federal da topografia (swisstopo) – Servezzan geologic svizzer
2021-2022
Organisaziun d'ün "field trip" in Engiadina Bassa per doctorants
CARTOGRIP organisescha quista stà (2022) ün chomp “illa champogna” per doctorants da las universitats da la Svizra occidentala (Bern, Fribourg, Lausanne e Genevra) – muossond directamaing differents fenomens geologics sül lö. L’Engiadina Bassa po spordscher quai in blers möds.
Incumbenza: CUSO (Conférences Universitaires de la Suisse Occidentale)
lügl 2022
Disegns da fossils per ün'ouvra per classifichar crappa
Purtretins da differents fossils chi’s po chattar illa crappa (impustüt in chaltscharais) disegnà per üna nouva ediziun dal cudesch “Gesteine einfach bestimmen”, scrit da Jürg Meyer da rundumberge.ch.
Incumbenza: rundumberge.ch
december 2021